ПОСЛЕДЕН ЗБОР

Воислав Санев

(1938 - 2007) археолог

На 7 април во Скопје згасна животот на Воислав Санев, еминентен археолог и научен работник.

„Воислав Санев беше високо признат и почитуван археолог од страна на добрите познавачи на праисторијата, особено на неолитот во Македонија и на Балканот. Неговите трудови ќе останат како азбучник за генерациите што ќе се едуцираат во сферата на праисториската археологија“, се зборовите со кои од својот член деновиве се простува и Македонското археолошко научно друштво.

Роден е во Кочани(1938), со основно и средно образование Санев се стекнал во Македонија, а дипломирал на Филозофскиот факултет во Белград на Катедрата за археологија. Од 1963 година работел во Народниот музеј во Штип, а во Музејот на Македонија се префрлил во 1975 година каде што и се пензионираше. Беше раководител на музејскиот Оддел за археологија и постојано се занимаваше со истражувачка теренска и кабинетска работа, оставајќи зад себе 40-ина отпечатени трудови со широк опус од македонската археологија. Беше претседател на Одборот за заштита на спомениците на културата во Штип; член на Одборот за Стоби, в.д. директор на Музејот на Македонија; претседател на Македонското археолошко научно друштво; дел од уредувачкиот тим на „Археолошка карта на Република Македонија“, како и на стручните списанија „Зборник“, Штип; „Археолошки зборник“, Скопје; Macedoniae Acta Arheologica и др.

Ги истражуваше неолитските населби во земјава: Анзабегово, Горубинци, Велушка тумба (Битолско), Мала тумба-Трн (Битолско), а најмногу се посвети на истражувањата на неолитската населба Тумба, Маџари (Скопско).

По повод смртта на Воислав Санев, утре во 11 часот во киносалата на Музејот на Македонија ќе се одржи комеморативна седница. (К.Б.)